前高雄縣政府古蹟評鑑委員會將美濃里社真官伯公、龍肚里社真官伯公、九芎林里社真官伯公等三个「伯公壇」列為縣定級古蹟，同時建議龍肚里社真官伯公列為省定級古蹟，因美濃該三个里社真官伯公，係全國他處絕無美濃僅有个「里社真官」伯公壇。
「里社真官」社祭神壇，大都在庄內總出水口所在，美濃該瀰濃庄、龍肚庄、九芎林庄里社真官伯公壇，就係在三位（處）庄頭个「水口」。
「風水」藏風聚氣、引水為財，「水口」為水流交會轉注之地，為留住財氣，除忒選好个水口所在，還須興建扼守關口个建築物，以增加「鎖鑰」氣勢，最常見个係以橋為主做為「關鎮」，再輔以亭台樹木、河堤柳塘等物。
美濃該三个「里社真官」伯公壇，位於全庄水流匯聚分水點項（上），該位（處）个水流更係全庄農作等日常生活賴以維生个水源，水口處毋只建有橋樑銜接溪流兩岸，還有三庄个開庄土地財神鎮守財位，成為美濃風土歷史最重要个標的。
廣東省蕉嶺同梅縣等客族先民來台時節，原定居佗（在）屏東縣里港鄉「武洛庄」摎（和）高樹鄉一帶，歇（住）里港个客族先民同當地河洛人爭戰，武洛庄右堆統領林豐山、林桂山兄弟，於乾隆元年（1736年）獲清廷准許入殖美濃，林家兄弟率武洛庄民百過（餘）人移往靈山開庄墾殖，在靈山山麓水口處興建土地伯公廟奉為「開基伯公」，定庄名「瀰濃」，甲午戰後日本佔領台灣，改名「美濃」。
歷經數代，美濃各庄紛紛成立，先後興建了蓋（許）多伯公廟，有兜富麗堂皇「神理神氣」，開基伯公因「鰱鯉吐信」地理，共樣保持古拙樸實風貌，居陋室而不改其被尊敬地位，扮演精神、政治、文化个中心地位，每逢區內大事，或政客參選時，必至該廟向「開基伯公」祈福許願，求祂保庇事事如意、心想事成。
「開基伯公」恰似代表美濃客族堅毅卓絕、吃苦耐勞、不求奢華享受个族性一樣，縣府將三个「里社真官」伯公壇列為縣定級古蹟，實至名歸。代表美濃年齡个「開基伯公」更係全國唯一，具有特殊歷史意義，經各界反映後，政府相關單位從善如流，已將開基伯公同東門城樓並列為古蹟。（作者／黃山高）
【漾新聞】#漾新聞 #高雄 ＃黃山高
看更多新聞 請點選「漾新聞」網址 https://youngnews3631.com/index.php
